________________
सुरसुंदररायकहा
१०९
पीढस्स उवरि सिसिरं, अंतो सोवाणमालियाकलियं । रयणसिलासयघडियं, दिप्पंतं दसदिसाचक्कं ॥१३९०।। अइसयउच्चत्तेणं, उल्लासितं व मज्झिमं गयणं । पिच्छइ कमेण सुमिणे, अइथोरथिरं महाखंभं ॥१३९१ ।। खंभस्स उवरि सासयपरिभमणपयासविहियवीसामं । मायंडमंडलं पिव उज्जोइयनहयलाभोयं ॥१३९२ ।। पवणचलसवणसहयरकणंतकिकिणिकलावकलिएहिं । विलंसतवेजयंतीसएहिं उग्घुट्ठ जयसदं ॥१३९३।। नीलिंदनील-मरगय-मसारगल्लाइरयणखंभेहिं । दूराउ पिच्छणिज्ज, मणिभवणं सो समारूढो ॥१३९४।। आरूढेण य सहसा, निज्जियरंभाइरूवसव्वस्सा ।। करकलियवेणुदंडा, अमुल्लपल्लंकसुनिसण्णा ॥१३९५॥ नियअच्छिपिच्छिएहिं, दीहर-तरलेहिं गयणमग्गम्मि । खीरोयजलहिलहरी पवाहमहिमं पसाहती ॥१३९६।। अवि य - वियसियकमलसरोवरलच्छी समसीसियाए गयणम्मि । वरइंदीवरकलियं कुणमाणा निययनयणेहिं ॥१३९७।। दरनिच्छोल्लियचंपयवन्ना कन्ना पवनतारुण्णा । भूसणमवि भूसंती, पलोइया संदरी तेण ॥१३९८।। सुमिणे वि सो विचिंतइ, अहह अहो ! रूवसंपया पवरा । . अहह अहो ! लायण्णं, अहह अहो ! जोव्वणारंभो ॥१३९९।। अच्छच्छ-फलिह-मरगयसभित्तिसंकंतचंगसव्वंगा । एगाणिणी वि बाला, सहइ सहीविंदपरियरिया ॥१४००।। मन्ने विहिणा विहिया, माणसमित्तेण सुंदरी एसा । नूणं न होज्ज खरकरफंसे एयारिसं रूवं ॥१४०१ ।। विज्जाहरेण केणइ, सुरेण असुरेण अहव मयणेण । ईसालुएण बाला, एसा मुक्का इहं दुग्गे ॥१४०२ ।।
___Jain Education International 2010_04
For Private & Personal Use Only
www.jainelibrary.org
