________________
२४२
जंबुचरियम् "लोयालोयपयासे उप्पण्णे केवलंमि वरनाणे । केवलिमहिमनिमित्तं समागया सुरवरा हिट्ठा ॥६२९॥ देववरवंद्रसहिओ एरावणवियडखंधमारूढो । देविंढो सम्पत्तो कयजयजयसद्दहलबोलो ॥६३०।। नच्चंति अच्छराओ गायंति य तत्थ किन्नरा तुट्ठा । उक्कुट्ठिजयजयरवं कुणंति असुरिंदेदेविंदा ॥६३१॥ वायंति दिव्वतूरे परिमुइया वाणमंतरा देवा । हरिसियमणा य सव्वे जोइसिया जयजयाविति ॥६३२॥ सक्केण समाणत्ता अह सव्वे सुरवरा हरिसिएण । केवलिमहिमं सिग्धं निव्वत्तह अह सुरेहिं पि ॥६३३॥ सोहेउं धरणियलं सव्वे संपाडिया निययसमया । गंधोदयं च वुटुं कुसुमुक्केरो कओ दिव्वो ॥६३४॥ मंदं मंदं पवणो पवाइओ सरहिसीयलो ताहे । निव्वत्तियं विसालं कणयमयं दिव्वपउमं ति ॥६३५।। तत्थुवविठ्ठो भयवं मणुयासुरदेवसूरचंदा य । उवविट्ठा गुरुपुरओ नमिउं सव्वे वि पयकमलं" ॥६३६।। "हरिसियमणेहिं ताहे भणियं देविंदपमुहदेवेहिं । निहओ ते मोहतरू भयवं कम्मिधणं दटुं ॥६३७।। पत्तं परमं तत्तं केवलनाणं जगुत्तमं तुमए । अप्पा सासयसोक्खे मोक्खपए ठाविओ धीर ! ॥६३८॥ सयलजयजंतुजम्मणजरमरणभओढुए भवसमुद्दे । जाओ य एस जम्मो भयवं तुब्भेत्थ सकयत्थो ॥६३९।। ता सकयत्थो भयवं भवभमणभयाउराण एस भवो । संजाओ अम्हाण वि जं पत्तं तुम्ह पयकमलं ॥६४०॥
___Jain Education International 2010_02
For Private & Personal Use Only
www.jainelibrary.org
