________________
सिरिभुयणसुंदरीकहा ॥ जह जह पेच्छइ तस्संगचंगिमं जह वियड्डसिंगारं । अइमणहरं च कीलं वियक्खणं वयणविन्नासं ॥६७५१।। सा जयसिरी वि तह तह दूरयरपवड्डमाणअणुराया । मूढ व्व थंभिया इव संजाया खीलियंगि व्व ॥६७५२।। तो सा सहीहिं भणिया 'किं देवो कोइ सावपभ(ब्भ)ट्ठो ? । विज्जाहरो व्व एसो विज्जाभट्ठो इहं पडिओ ?' ॥६७५३।। तं रायसुया सोउं ‘मा कह वि वियक्खणाओ एयाओ । मुणिह(हिं)ति ममं' ति तओ करेइ आयारसंवरणं ॥६७५४।। 'कुसुमरयदूसियाई पेच्छ हले ! मह गलंति अच्छीणि । सिसिरानिलेण पेच्छइ सरीरमुव्वहइ उद्धोसं' ।।६७५५ ।। इय जा सहीण पुरओ सा एवं भणइ अभयचंदेण । ता सा वि कह वि दिट्ठा दुमंतरालेण सप्पणयं ।।६७५६।। अह सो वि तह च्चिय साणुरायचित्तो असेसमित्तेहिं । सच्चविओ सभएहिं सगिहं च छलेण आणीओ ॥६७५७।। तो ताण वयंसाणं मज्झे केणाऽवि चवलचित्तेण । जयसिरि-सेट्ठिसुयाणं सरूवमावेइयं पिउणो ।।६७५८।। तेणाऽवि अभयचंदो एगते सदिऊण सिक्खविओ । सप्पणयं साणुणयं सगौरवं सबहुमाणं च ।।६७५९।। 'पुरिसेण सया पुत्तय ! सजाइसमचेट्टिएण होयव्वं । सकुलट्टिइं चयंतो इहपरलोए य होइ दुही ॥६७६०।। वणियाण पुण विसेसेण पुत्त ! एवंविहो समायारो । इह जाण जोव्वणे वि हु वुड्डाण व होइ आयरणं ॥६७६१।।
Jain Education International
For Private & Personal Use Only
www.jainelibrary.org
