________________
सिरिभुयणसुंदरीकहा ॥ सोयंसुकणकणारियमच्छिजुयं धोइऊण सलिलेण । भूसन्नाए निउत्तो मंती 'कहसु' त्ति नरवइणो ॥३९९३।। तो भणइ महामंती 'आयन्नसु बंधुयत्त ! एक्कमणो । नरवइणा आइट्ठो जहत्थवयणं तुह कहेमि ॥३९९४।। इय बंधुयत्त ! राया चंदसिरि-कुमारविरहदुक्खेण । तह मूढो अइदूरं जह मन्ने होउ भणिएण ॥३९९५।। ते आगमोवएसा ताई चिय गुरुयणस्स वयणाई । कुमराणुराएणं पिव हियएण समं पवसियाइं ॥३९९६।। जे च्चिय कीरंति तहिं नरिंददुक्खस्स उवसमोवाया । तेहिं चिय अहियअरं तं वड्डइ अणुसएणं व्व ॥३९९७।। जे हिययहारिणो किर कीरंति तहाविहा रसविणोया । ता सो च्चेय रसन्नू तिरिच्छसल्लं व ठाइ मणे ॥३९९८।। इय एवमपेच्छंता दुक्खुवसामस्स कारणमिमस्स । अम्हे वियक्खणा विय परोवएसारिहा जाया ॥४९९९।। अह अण्णदिणे राया संज्झासमयंमि वंदियजिणिंदो । दाहोवसमनिमित्तं उवरिमवलहिं मए नीओ ॥४०००। जा तत्थ खणं चिट्ठइ सिसिरानलसंगलद्धतणुसोक्खो । खे संचरंतखेयरजणाण ता सुणइ संलावं ॥४००१।। तो वारिऊण परियणकलयलसदं तद्दे(दे)कगयचित्ता । निसुणामो जावऽम्हे ता भणियं उवरि खयरेण ॥४००२।। 'जह पवणकेउणा सो मारिज्जंतो न जलहिमझंमि । ता तब्भएण पवणो वाऊ वि न एत्थ वाएज्ज ॥४००३।।
.
Jain Education International
For Private & Personal Use Only
www.jainelibrary.org
